Charrando con.
Azuzena Lozano (Consellera d'Azión Sozial d'a Redolada d'a Plana de Uesca).

Tenemos con nusatros á ra masima responsable de l'aria d'azión sozial en a redolada nuestra. En a suya ampla treyeutoria pulitica podemos siñalar que ye una d'as presonas fundadoras de CHA, partito d'o que estió Presindenta, e ye estata á o largo de tres lechislaturas conzellera en o Conzello de Uesca, puesto que agora compachina con o de Consellera comarcal.

- Azuzena, ¿Cuál estió l'ochetibo prioritario cuan t'embrequés con ista responsabilidá?
- R: A berdá ye que estió un autentico reto, porque empezipiábanos dende zero en a redolada, sin guaire presonal e con unas condizions cheograficas poco faborables. Para cuenta si ixo ye asinas, que bi ha 115 lugars que atender con una densidá de poblazión de 5,9 abitadors por quilometro cuadrato, o que suposa una dispersión muito gran. Por ixo o mío ochetibo inizial estió guarenziar l'azeso d'istas presonas ta os Serbizios Sozials, con independenzia d'o lugar de prozedenzia.

- ¿En qué mida ez adubito?
- R: Como ye de dar, nos en quedan d'ochetibos importans que consiguir, pero o que emos feito por agora ye dar soluzions á ras nezesidaz basícos d'a combibenzia presonal, familiar e sozial en toz os nuestros lugars.

- ¿Cuáls son istos serbizios basícos?
- R: O Serbizio de "Aduya á domizilio", a "Teleasistenzia", "Aduyas d'urchenzia", "Estadas temporals en Residenzias", "Apoyo á o cudiador en o domizilio", "Trasporte sozial", "Alox alternatibo". E te puedo dizir con una lechitima satisfazión que en iste inte no tenemos listas d'aspera en istos serbizios.

- Efeutibamén, ixo merexe un reconoximiento e una felizitazión.
- R: Un reconoximiento que yo tresladarba á tot o nuestro presonal. Dende os Treballadors Sozials e a Educadora Sozial, dica l'Asesoría Sicolochica e a Churidíca. O suyo treballo e a suya adedicanza nos premiten aduyar á os abitadors que atendemos (muitos d'els d'edá abanzata) á retaliniar problemas de discapazidá, d'integrazión sozial, d'asistenzia á presonas dependiens,. Cada día atendemos á menors, á biellos, á inmigrans.interbenimos en familias desestruturatas, en malos tratos á mullers.

- ¿Qué atros serbizions soz soministrando?
- R: Cata, tenemos muito claro que emos de contribuyir á amillorar a calidá de bida en o meyo rural e ixo nos desiche ir "dillá". Por ixo creigo poder afirmar que somos estatos innobadors y emos meso en marcha Tallers de Relaxazión, de Memoria, y emos organizato un Serbizio de Podolochía d'o que sentimos un lechitimo orgüello. Por meyo d'iste serbizio nos embrecamos á acudir á toz os nuestros lugars e dar serbizio en o domizilio á todas as presonas que no pueden amanar-se ta ra Unidá Móbil. ¡E lo femos á o mesmo pre que en Uesca! ¡Ni un zentimo más!

- ¿Creyes que bi ha "sentimiento de redolada" en a Plana de Uesca?
- R: Yo creigo que encara no ye pasato guaire tiempo, pero dende CHA tenemos platero que queremos "fer comarca" e fazilitar a comunicazión e a relazión entre as chens de os nuestros lugars. Por ixo emos organizato a Trobada de Mullers d'a Plana de Uesca, que ista añada zaguera emos feito, con muita partizipazión, en Almudébar. Y en ista endrezera ban os pautos e as subenzions que aportamos á Asoziazions e Conzellos e que ista añada zaguera han sobrepuyato ros 900.000 euros.

- ¿Qué retos quedan pendiens?
- R. Con independenzia d'a nuestra ideyolochía pulitica, ye impreszindible, e asinas lo nos desichen os ziudadanos, continar fendo abanzes en a coordinazión y en a colaborazión entre Partitos, Almenistrazions y Entidaz que treballan en Azión Sozial. En ixo i somos, porque solamén asinas podremos fer fren á problemas como ro trasporte, creyar Zentros de Día, Escuelas Infantils, Residenzias.

- Asperamos tornar a charrar con tu ta continar beyendo ros abanzes en matiera sozial. ¿Quiers dizir bella cosa más ta rematar?
- R: Yo me quedarba con una pensada d'Einstein: "Una d'as cosas más importans ta retaliniar un problema ye beyer que esiste". Dende Azión Sozial ya emos bisto que esiste, pero antimás d'ixo somos planteyando, mirando e aportando soluzions. Grazias.